Өмнөд Солонгосыг түймрийн гамшиг нөмөрлөө: Түүхэн дэх хамгийн том ойн түймэр

2025 оны -дөрөвдүгээр сарын 11-нээс эхлэн Өмнөд Солонгосын төв болон өмнөд нутгуудад зэрэгцэн гарсан олон арван ойн түймэр улс орныг бүхэлд нь цочроосон ноцтой байгалийн гамшиг болж, түүхэнд бүртгэгдэн үлдлээ. Хүчтэй салхи, хуурайшилт, уур амьсгалын өөрчлөлтийн улмаас нөхцөл байдал хяналтаас гарч, 20 гаруй түймэр зэрэг дэгдсэн нь олон хүний амь нас, эд хөрөнгөд нөхөн сэргэшгүй хохирол учруулсан юм. Түймрийн улмаас 32 хүн амь насаа алдаж, 51 хүн шархадсан байна. Олон айл өрх гэрээ орхин яаралтай нүүх шаардлагатай болж, нийт 37,000 гаруй иргэн аюулгүй бүс рүү нүүлгэн шилжүүлэгдсэн. Галын аюулт тархалт 102,528 га газар нутгийг бүрэн хамарч, олон зуун орон сууц, үйлдвэрийн барилга, нийгмийн дэд бүтэц бүрэн шатжээ. Онц байдал зарласан эрх баригчид гал унтраах ажиллагаанд улсын бүх шатны хүч хэрэгслийг дайчилж, онгоц, нисдэг тэрэг, гал сөнөөгчид, сайн дурын ажилчид зэрэг өргөн хүрээний хүчин чармайлт гаргасан ч гамшгийн цар хүрээ өдөр ирэх тусам тэлсээр байв. Түймрийн хамгийн харамсалтай хохирлын нэг нь VII зууны үед байгуулагдсан, буддын шашны түүхэн дурсгал болох Гоунса хийд шатаж устсан явдал байлаа. Уг хийд нь Өмнөд Солонгосын соёл, шашны үнэт өвийн нэг бөгөөд олон зууны турш хадгалагдаж ирсэн түүхэн ховор бүтээлүүд түймэрт өртөн үгүй болсон байна. Мэргэжилтнүүдийн үзэж байгаагаар уур амьсгалын өөрчлөлт, гантай улирал, үргэлжилсэн хуурайшилт болон хүчтэй салхи нь түймрийн гол шалтгаануудын нэг болсон бөгөөд цаашид иймэрхүү гамшгууд дахин давтагдах эрсдэл өндөр байгааг анхааруулжээ. Өмнөд Солонгосын энэхүү түүхэн гамшиг нь дэлхий нийтийн анхаарлыг дахин уур амьсгалын өөрчлөлтийн бодит нөлөө, ой хамгаалал, гамшгаас сэргийлэх урьдчилан сэргийлэлт, бэлэн байдлын чухлыг онцлон харуулж байна.