Өмнөд Солонгосын Ерөнхийлөгчийн сонгуулийн санал хураалт өнөөдөр албан ёсоор эхэллээ. Үндэсний сонгуулийн хорооноос мэдээлснээр улсын хэмжээнд 14295 санал авах байр байна.
Санал хураалт 06:00 цагт эхэлсэн бөгөөд 20:00 цаг хүртэл үргэлжилнэ. Өглөөнөөс хойш гурван цагийн хугацаанд нийт сонгогчийн 9.2 хувь буюу 4.09 сая орчим хүн саналаа өгчээ. Санал хураалтыг хаасны дараа саналыг тоолж эхэлнэ гэж тооцвол шөнө дундын орчимд ялагч тодрох магадлалтай аж.
Санал тоолж дууссаны дараа Үндэсний сонгуулийн хороо лхагва гаригийн 07:00-09:00 цагийн хооронд чуулганыг хуралдуулж, сонгуулийн дүнг албан ёсоор зарлана. Үүнээс хэдхэн цагийн дараа Үндэсний ассамблей дээр тангараг өргөх ёслол болно. Ингээд шинэ Ерөнхийлөгч шууд ажлаа хүлээж авна.
Ерөнхийлөгчийн сонгуульд нийт таван нэр дэвшигч өрсөлдөж байгаа бөгөөд хамгийн магадлал өндөртэй нь Ардчилсан намаас нэр дэвшигч Ли Жэ Мён, Ардын хүч намын Ким Мүн Сү нар юм. Бусад гурван нэр дэвшигч нь Шинэчлэлийн намын Ли Жүн Сок, Ардчилсан хөдөлмөрийн намын Квон Ён Гук, бие даан нэр дэвшигч Сон Жин Хо нар аж.
