БНХАУ-ын Эрээн хотын гаалийн талбайд 8000 тонн хагас коксон, “Тавантолгой түлш” компанийн үйлдвэрт 35 мянган тонн түлш нөөцлөөд байгаа бөгөөд Улаанбаатар хот рүү хоногт 2200-4400 тонн түлш тээвэрлэн хүргэж байна. Түлшний чанарыг хөндлөнгийн лаборатори, хоёр улсын хяналтын алба хянаж байгаа бөгөөд Хятадаас энэ өвөл 306 мянган тонн хагас коксон шахмал түлшийг саадгүй тээвэрлэж хүргэхээ мэдэгдсэнийг НЗДТГ мэдээлэв.
Хагас коксон шахмал түлшийг хэрэглээнд нэвтрүүлснээр агаар бохирдуулагч хүхэрлэг хий, азотын исэл, тоосонцрын хэмжээг хоёр дахин багасгах боломжтой. Учир нь хагас коксон шахмал түлшний техникийн шаардлагыг олон улсын стандартын дагуу тогтоож, хоёр улсын дундын буюу хөндлөнгийн итгэмжлэгдсэн лаборатори CCIC чанарыг хянадаг байна. Лабораторийн шинжилгээгээр хагас коксон шахмал түлшний чийглэгийн хэмжээ 6, үнсний хэмжээ 20, дэгдэмхий бодисын гарц 12, хүхрийн хэмжээ 0.5 хувиас бага байгааг нотолжээ. Шинжилгээний үр дүнг үндэслэж гаалийн бүрдүүлэлт хийснээр түлшийг Эрээний гаалийн хяналтаар нэвтрүүлдэг. Мөн Монголын гаалийн лаборатори дээж авч, хянадаг ажээ.
Одоогоор 90 мянга гаруй тонн хагас коксон шахмал түлшийг өргөн царигаар БНХАУ-аас импортлоод байгаа юм. Энэ талаар Замын-Үүд өртөөний ачаа тээвэр хариуцсан орлогч дарга Б.Өлзийбат “Вагон тээвэрлэлтэд хувийн хэвшлийн дөрвөн байгууллага оролцдог. Манайх Эрээн өртөөнөөс ачааг бичиг баримтын дагуу хүлээн авч, шуурхай нэвтрүүлээд, төмөр замын ачаанд оруулж, тээвэр жуучийн байгууллага гаалийн бүрдүүлэлт хийснээр орон нутгийн бичиг баримтаар Баян өртөө рүү хүргэдэг. Цаг хугацааны хувьд Замын-Үүд өртөөгөөр орж ирсэн ачаанд гаалийн бүрдүүлэлт хийн, 4-5 цагт нэвтрүүлж, Баян өртөө хүртэл 24 цаг, буулгахад 24-48 цаг зарцуулж, эндээс Чойр өртөө рүү нэг хоног тээвэрлэн, ачилтыг 2-3 хоногт хийж, нэг заставын бүтэн эргэлтийг 5-7 хоногт хийж байгаа” хэмээжээ.
