Трамп фермерүүдэд 12 тэрбум ам.долларын тусламж үзүүлнэ
АНУ-ын Ерөнхийлөгч Дональд Трамп хөдөө аж ахуйн салбарыг хамгаалах зорилгоор 12 тэрбум ам.долларын тусламжийн хөтөлбөрийг зарлалаа. Энэ шийдвэр нь ургацын үнэ буурч, худалдааны хурцадмал байдал нэмэгдэж буй нөхцөлд фермерүүдийн эдийн засгийн бэхжихэд чиглэсэн онцгой алхам болж байна. Тус багц нь хятадтай хийж буй худалдааны дайны улмаас үүссэн өнөөгийн нөхцөл байдалд тусгайлан зориулагджээ.
Тусламжийн багцын 11 тэрбум ам.доллар нь эрдэнэ шиш, улаан буудай, хөвөн, буурцаг, будаа зэрэг гол ургац тариалдаг фермерүүдэд нэг удаагийн тэтгэмж хэлбэрээр олгогдох юм. Энэ нь зах зээлд үнийн дарамт буурч, хөдөө аж ахуйн салбарын эдийн засгийн тогтвортой байдлыг хангахад чиглэсэн стратегийн ач холбогдолтой. Үлдсэн нэг тэрбум ам.доллар нь ургацын бусад төрлийн үйл ажиллагаа эрхэлдэг фермерүүдэд зориулагдаж, эдгээрийн борлуулалтыг дэмжих, ирэх жилүүдэд ургац хураахад бэлдэх нөхцөлийг бүрдүүлэх зорилготой.
Энэхүү дэмжлэг нь АНУ-ын хөдөө аж ахуйн салбарын хувьд шинэ боломж нээж өгч буй бөгөөд, үүний үр дүнд фермерүүд зах зээлд илүү өрсөлдөх чадвартай болох, ургацын үнэ тогтвортой байдалтай болох нөхцлийг бүрдүүлэх төлөвтэй байна. Мөн энэ арга хэмжээ нь дэлхийн зах зээл дээрх үнэ ханшийг тогтворжуулахад хувь нэмэр оруулах магадлалтай бөгөөд эдийн засгийн хүндрэлийг даван туулахад чухал дэмжлэг үзүүлэх нөлөөтэй.
Түүнчлэн энэ удаагийн мөнгөн тусламж нь анхных биш бөгөөд Трамп тус салбарт 2019 онд 22 тэрбум, 2020 онд 46 тэрбум ам.долларын дэмжлэг үзүүлж байжээ. Энэ нь улс төрд өрсөлдөх чадвартай, эдийн засгийн тогтвортой байдлыг хадгалах стратегийн нэг хэсэг болохыг шинжээчид онцолж байна.
Эх сурвалж Reuters
Мэдээ бэлтгэсэн Ө.Дөлгөөн
