АНУ-ын Ерөнхийлөгч Дональд Трамп зургаадугаар сарын 1-нээс эхлэн Европын холбооны улс орнуудын импортын бараа бүтээгдэхүүнд 50 хувийн тариф ногдуулахаар болсон. Тэрбээр "Truth Social" цахим хуудаснаа Европын холбоотой хийсэн яриа хэлэлцээ нь ямар ч үр дүнд хүрэхгүй байгаа тул тариф нэмэгдүүлэх хүсэлтэй байна гэдгээ илэрхийлсэн. Мөн импортын саад бэрхшээл, нэмэгдсэн өртгийн албан татвар, валютын заль мэхээс болж АНУ-ын Европын холбоотой хийсэн худалдааны алдагдал нь хүлээн зөвшөөрөх боломжгүй болсон гэж Трамп дурджээ. Мөн тэрбээр "Тус эвсэл АНУ-ын давуу талыг ашиглаж байгаа учир би цаашид хэлэлцээ хийхээ болихоор шийдсэн" гэжээ. "Bloomberg"-ийн мэдээлснээр, Европын холбооны удирдагчид өмнө нь тарифын шинэ тогтолцоог санал болгосон байсан. Энэ нь хоёр тал хөдөө аж ахуй, аж үйлдвэрийн зарим барааны татварыг аажмаар тэглэхийг уриалж байсан аж.
Трампийн АНУ дахь үйлдвэрлэлийг нэмэгдүүлэх хүчин чармайлт технологийн аварга "Apple" компанид ч мөн адил нөлөөлж байна. Тэрбээр тус компанид "iPhone" гар утсаа Америкт үйлдвэрлэх эсвэл 25 хувийн тариф төлөх гэсэн сонголтоос нэгийг нь сонгохыг шаардсан юм. Гэсэн хэдий ч "Apple" компанийн гүйцэтгэх захирал Тим Күүк өндөр татвараас зайлсхийхийн тулд үйлдвэрлэлээ Хятадаас Энэтхэг рүү шилжүүлэх төлөвлөгөөгөө зарласан байдаг.
