Улсын Их Хурлын чуулганы нэгдсэн хуралдаан үргэлжилж байна. Чуулганы үеэр УИХ-ын гишүүн Ж.Чинбүрэн эрүүл мэндийн салбар, тэр дундаа эм, эмийн хэрэгсэлтэй холбоотой асуудалд шүүмжлэлтэй хандаж тогтоолд өөрчлөлт орж амжаагүй байхад БНСУ-ын таван эмийн үйлдвэрээс авч буй 23 төрлийн эмэнд хөнгөлөлт олгож буй нь хууль зөрчсөн үйлдэл хэмээн шүүмжлэв.
Уг шүүмжлэлийн хариуд Эрүүл мэндийн сайд Т.Мөнхсайхан: Шинэчлэн найруулагдсан эм, эмнэлгийн хэрэгслийн тухай хуульд заасан зүйл заалтын дагуу бүх үйл ажиллагаагаа явуулж байгаа. Хэрэв ямар нэгэн хууль зөрчсөн процесс байгаа бол үүнийг хууль хяналтынх нь байгууллагад өгөөд шалгуулчих л даа. Тэгэхгүй бол Ж.Чинбүрэн гишүүн эрүүл мэндийн салбар л болохгүй байгаа мэт байнга яриад, сошлоор ажлаа хийгээд яваад байхаар чинь салбарын нэр хүнд унаад байна ш дээ. Та үнэхээр тийм процессийн алдаа байгаа бол хууль хяналтынх нь байгууллагад өгөөд шалгуулчих л даа.
Надад БНСУ-ын эмнэлэг, эмийн үйлдвэртэй гэрээ хийсэн зүйл огт байхгүй гэдгийг би танд хэлээд байгаа шүү дээ. Бид ДЭМБ-аас хүлээн зөвшөөрөгдсөн байгууллагуудад шинэчлэгдсэн эм, эмнэлгийн хэрэгслийн тухай хуулийнхаа талаар танилцуулах ёстой.Үүнийг танилцуулсны үндсэн дээр гаднын чанартай эм үйлдвэрлэгч улсууд хямд үнээр эмээ өгөх боломж бүрдэж байгаа. Үүний үр дүн иргэдэд хүрээд, иргэд үүнд сайшаалтай хандаж байгаа шүү дээ. Жишээ нь ахмадууд сахарынхаа дараа сарын эмийг авч чаддаггүй байсан бол үүнийг 60 мянгаас 6 мянга болгосон, өмнөх эмээс нь үйлчилгээ нь сайжирсан. Зүрхний стент тавиулсан хүмүүс сар бүр цус шингэлэх эмээ 170 мянган төгрөгөөр авдаг байсан бол 17 мянган төгрөг төлөөд уудаг болсон байна. Эмч, өвчтөнгүй сэтгэл ханамжтай байгаагаа илэрхийлээд байна. 2026 оны төгсгөл гэхэд бид чанаргүй эмийг зах зээлээс шахаж гаргах, хямд үнэтэй эмээр хангах бодлого маань маш амжилттай хэрэгжээд явж байна.
