Засгийн газрын өнөөдрийн хуралдаанаас гаргасан зарим шийдвэрийн талаар ЗГХЭГ-ын дарга С.Бямбацогт мэдээлэл өглөө. Тэрбээр, "Нэгдүгээрт, яамдын бүтэц, орон тоо, зохион байгуулалтын асуудлыг хэлэлцлээ. 58 үндэсний хороог хоёр дахин бууруулж, яамдын нэгжийг 31 хувиар цомхотгохоор болсон. Тухайлбал, 16 яаманд 138 газар байсныг 109 болгож, 132 хэлтэс байсныг 77 болгож цөөлөхөөр боллоо. Яамдын дарга 270 байсныг 186 болгож буурууллаа. Тэгэхээр нэг яам дээд талдаа 10-14 даргатай байхаар бүтцийн өөрчлөлт хийж байна. Эдийн засаг, хөгжлийн яам 28 даргатай байсан бол 14 болгосон. Ингэснээр нийт 86 даргыг цөөллөө.
Хоёрдугаарт, Монгол Улсын Ерөнхий сайдын дэргэд газрын харилцаа, сангийн асуудал эрхэлсэн агентлаг ажилладаг. Гэвч сум, хороонд иргэдийн өмчлөх газрыг Ерөнхий сайдын түвшинд шийддэг нугалаа гардаг байсан. Буцаагаад сум, аймаг, нийслэлийн Засаг даргын түвшинд шийдвэрлүүлэхээр шилжүүллээ.
Гуравдугаар, эрчим хүч хамгийн их асуудалтай салбар. Үр ашиггүй зардал ихтэй. Тиймээс Увс, Баян-Өлгий, Ховд аймгийн эрчим хүчний сүлжээг нэгтгэж, Эрчим хүчний эдийн засгийн хүрээлэнг Эрчим хүчний судалгаа, хөгжлийн төвтэй нэгтгэхээр боллоо" хэмээв.
