КИЕВ, 2025 оны тавдугаар сарын 12 /Anadolu/. Истанбулын энхийн хэлэлцээг сэргээх Оросын саналыг хүлээн авч байна гэж Украины Ерөнхийлөгч В.Зеленский ням гарагт мэдэгджээ. ОХУ-ын Ерөнхийлөгч В.Путиний саналыг зөвшөөрөхийг АНУ-ын Ерөнхийлөгч Д.Трамп Киевт уриалсны дараа уг мэдэгдлийг хийсэн байна.
В.Зеленский мөн "Оросын тал даваа гаргаас эхлэн гал зогсоохыг хүлээж байна" гэжээ. “Дипломат яриа хэлэлцээг эхлүүлэх суурийг тавихын тулд маргаашаас эхлэн урт хугацаанд галыг бүрэн зогсооно гэдэгт бид найдаж байна.
Би Путинийг Туркт пүрэв гарагт хүлээж байх болно. Энэ удаад оросууд шалтаг хайхгүй байх гэж найдаж байна” хэмээн тэрбээр хэлсэн байна. Ням гарагт шилжих шөнө ОХУ-ын Ерөнхийлөгч В.Путин 2022 оны гуравдугаар сард тасалдсан энхийн хэлэлцээг Туркт үргэлжлүүлэх саналыг Киевт тавьсан юм. Харин бямба гарагт В.Зеленский Герман, Франц, Польш, Их Британийн удирдагчдын хамтаар тавдугаар сарын 12-ноос эхлэн 30 хоногийн хугацаанд гал зогсоохыг санал болгосон билээ.
Истанбул хотноо 2022 онд болсон Орос-Украины энхийн хэлэлцээг үргэлжлүүлэхийг дэмжсэнд сэтгэл хангалуун байгаагаа Туркийн Ерөнхийлөгч Р.Эрдоган ОХУ-ын Ерөнхийлөгч В.Путинтэй ням гарагт утсаар ярих үеэрээ илэрхийлжээ.
Р.Эрдоган Орос, Украины энхийн хэлэлцээг Истанбул хотноо сэргээн явуулах тухай В.Путиний мэдэгдлийг сайшааж, Турк улс урт хугацааны шийдэлд хүрэх хэлэлцээг зохион байгуулахад бэлэн байна гэж мэдэгдсэн байна. В.Зеленский Украины тал Истанбулд Оростой яриа хэлэлцээгээ сэргээхийг зөвшөөрсөн гэдгээ зарлахын өмнө Д.Трамп “Truth Social” хаягтаа бичихдээ "Путин Украинтай гал зогсоох хэлэлцээр байгуулахыг хүсэхгүй байгаа, харин тэдэнтэй пүрэв гарагт Туркт уулзаж, цус урсгасан мөргөлдөөнийг эцэслэх талаар хэлэлцээ хийхийг хүсэж байна" гэжээ.
“Украин үүнийг нэн даруй зөвшөөрөх ёстой. Ингэснээр наад зах нь хэлэлцээр хийх боломжтой эсэхийг тодорхойлж чадна, хэрэв боломжгүй болбол Европын удирдагчид болон АНУ холбогдох арга хэмжээг авах болно” гэж тэрбээр хэлсэн байна.
Мөн "Путин дэлхийн II дайны ялалтыг тэмдэглээд тун завгүй байгаа, АНУ-гүйгээр уг дайнд ялалт байгуулах боломжгүй байсан" гээд Украины тал түүнтэй тохиролцоно гэдэгт эргэлзэж эхэлснээ дурдсан байна. Эцэст нь, Д.Трамп “Яг одоо уулз” хэмээн хэлжээ.
Э.Хулан Эх сурвалж: "Монцамэ" агентлаг
