Оросын дипломат албаныхан хэдэн арван палестин болон орос иргэдийг Газын зурвасаас аюулгүй гаргах ажиллагаа явуулсан гэж ОХУ-ын Гадаад хэргийн яам Пүрэв гаригт (2025.09.18) мэдэгдэв. Хэвлэлийн төлөөлөгч Мариа Захаров төрийн мэдлийн ТАСС агентлагт хэлэхдээ, энэ долоо хоногт Израилийн Батлан хамгаалах хүчин Газад хуурай замын довтолгоогоо эрчимжүүлсэн.
Улмаар Лхагва гаригт Палестины засаг захиргаанд суугаа ОХУ-ын төлөөлөгчийн газар болон Иордан дахь элчин сайдын яамны тусламжтайгаар 50 орчим хүнийг анклаваас гаргасан гэж мэдэгдэв.Захаровын хэлснээр, 26 орос, 24 палестин хүнийг Газаас эсэн мэнд гаргаж чадсан бөгөөд тэдний 25 нь хүүхэд, 11 нь эмэгтэй байсан. Эдгээр хүмүүсийг Керем Шалом шалган нэвтрүүлэх боомтоор Египет рүү нэвтрүүлж, дараа нь Иордан руу илгээжээ. Аюулгүй газарт очсон хүмүүсийн нэг нь РИА Новости агентлагт хэлэхдээ, Оросын дипломатууд Москва руу нислэгийн захиалга хийж өгсөн бөгөөд гэр бүлийн хамт Санкт-Петербург руу явах болсон.
Палестины нутаг дэвсгэрт дайн хийж буйг олон улсын зүгээс буруутгаж байгаа ч Израиль Мягмар гаригт хуурай замын довтолгоогоо эрчимжүүлжээ. НҮБ-ын шинжээчид энэ долоо хоногт мэдэгдэл гаргаж, Израиль улс палестинчуудыг хоморголон устгаж байна гэж буруутгасан. Гэсэн хэдий ч Израиль уг мэдэгдлийг няцааж, худал мэдээлэл гэж үзсэн байна. НҮБ-аас наймдугаар сард Газын зурвас болон ойролцоох газруудад нэг сая орчим хүн амьдарч байна гэж тооцоолсон бол Израилийн тал 350 мянга орчим хүн дүрвэсэн гэж мэдэгджээ. Газа дахь эрүүл мэндийн албаныхан Пүрэв гаригт 79 палестин хүн Израилийн цохилтод амь алдсан гэж мэдэгдээд байна.
