Нью-Йорк хотод зэвсэгт этгээд халдлага үйлдэн дөрвөн хүний амь хохирчээ

Нью-Йорк хотын барилгад зэвсэгт этгээд гал нээж, дөрвөн хүн амь үрэгдсэний нэг нь цагдаагийн алба хаагч байжээ. Тухайн этгээд нь 27 настай Шэйн Девон Тамура гэх эрэгтэй бөгөөд барилгын лобби болон 33 дугаар давхарт байсан хүмүүс рүү гал нээж, эцэст нь өөрийнхөө цээжин тус газарт буудан амиа егүүтгэжээ. Одоогийн байдлаар Тамура Лас Вегасаас Нью-Йорк руу ирснийг тогтоосон ч ямар зорилготой байсан нь тодорхойгүй байгаа юм. Амь үрэгдсэн хүмүүсийн нэг нь барилгын хамгаалалтад ажиллаж байсан Нью-Йорк хотын цагдаа Дидарул Ислам гэдгийг албанаас мэдэгдэв. Түүнийг лоббид буудан хороосон бөгөөд бусад гурван хохирогчийн нэр одоогоор ил болоогүй байна.

Халдлагын үеэр хүмүүс айж сандарсан бөгөөд зарим нь тавилгын ард, хаалгануудаа түгжиж нуугдсан бол зарим нь гадагш зугтжээ. Цагдаа нар Тамура нь сэтгэцийн эрүүл мэндийн асуудалтай байсан гэж мэдэгджээ. Тэрбээр Лас Вегасаас Нью-Йорк руу ирэхдээ Колорадо, Небраска, Айова, Нью Жерси зэрэг мужаар дамжин ирснийг тогтоосон аж. Тамурагийн машиныг барилгын гаднаас олсон бөгөөд дотроос нь нэмэлт сум, гар буу олжээ.