2025 оны долоодугаар сарын 22-ны өдөр иргэн Э телеграмм аппликейшнээр “мөнгөө өсгөх” зорилготой зард итгэж, нэр бүхий хаягтай холбогдон хоёр удаагийн гүйлгээгээр бусдын данс руу 13,7 сая төгрөгөө залилуулжээ. Зөвхөн баяр наадмын өдрүүдэд гэхэд л залилах 28 гэмт хэрэг цагдаагийн байгууллагад бүртгэгдэж, иргэд 248.7 сая төгрөгөөр хохирчээ. Нийт бүртгэгдсэн цахим залилангийн хэргийн 50 хувийг “Телеграм”-аар үйлдэж байгаа аж.
Мөн энэ оны зургаан сарын байдлаар даалгавар биелүүлэх телеграм ашигласан залилан 668, хандив гэх нэрийн дор үйлдсэн 474, бусдын цахим хаяг ашиглаж үйлдсэн цахим залилангийн 386 гэмт хэрэг тус тус бүртгэгджээ. Иргэд амар хялбар аргаар мөнгө олох зорилгоор телеграм, фэйсбүүк зэрэг платформоор дамжуулан гэмт хэргийн хохирогч болсоор байна. Тиймээс үл таних этгээдэд мөнгө шилжүүлэхгүй байх, хувь хүний мэдээллээ задруулахгүй байх. Баталгаагүй эх сурвалжаас ирсэн холбоос, мессеж, гүйлгээний хүсэлтийг анхааралтай шалгаж, хувийн мэдээллээ хуваалцахаас зайлсхийх хэрэгтэйг цагдаагийн байгууллагаас анхаарууллаа.
