Баяр наадмын тасалбарыг өнөө өглөө 07.00 цагаас эхлэн enaadam.mn сайтаар борлуулж эхлэх тухай мэдээлэл түгсэн. Баяр наадмын нээлтийн ёслол, бөхийн барилдаан зэрэг Төв цэнгэлдэх хүрээлэнд болох арга хэмжээний дооолдугаар сарын 11, 12-ны өдрийн тасалбарын багц суудлаас хамаарч, 100, 130, 150 мянган төгрөгийн үнэтэй борлуулах юм байна.
Наадмын нээлтийн ёслол болон бөхийн барилдааны тасалбарыг нэг иргэн хоёр тасалбар авахаар зохицуулалт хийсэн. Харин орой Цэнгэлдэх хүрээлэнд болох баярын концертын тасалбарыг ticket.mn-ээр борлуулах ба иргэд хүссэн тоогоороо авах боломжтой. Харин иргэд өнөө өглөө 07.00 цагаас баяр наадмын тасалбар авах гэж хичээсэн ч чадаагүй байна. 07.05 гээд ороход л тасалбар дуусан гэсэн хариу өгч, наадамчин олныг бухимдуулаад байна. Жилийн жилд үндэсний их баяр наадмын тасалбарын олдоц муу, дийлэнх нь шагчдын гарт ордгоос иргэд өндөр үнээр худалдан авах болдог. Энэ удаад ч 07.00 цагаас эхлэн оролдсон ч авч чадаагүй иргэд энэ асуудлаа цэгцлэхийг хүслээ. Наадмын нээлт, хаалтын тасалбарыг борлуулна гэдэг ч бөөн бухимдал болоод дуусдаг энэ байдалд анхаарахыг Хотын даргаас иргэд шаардлаа. Борлуулах нэрийдлээр шагчдын гарт очдог наадмын тасалбарын хэл ам энэ жил ч тасарсангүй.
